രാജപുരം: രാജപുരം ടൗണിലും പരിസര പ്രദേശങ്ങളിലും തെരുവ്നായ ശല്യം വൻതോതിൽ രൂക്ഷമാകുന്നു. കാൽനടയാത്രക്കാരും വ്യാപാരികളും ഒരുപോലെ ഭീതിയിലാണ്. പുതിയ അധ്യയനവർഷം ആരംഭിച്ച് സ്കൂളുകൾ തുറക്കാൻ ദിവസങ്ങൾ മാത്രം ബാക്കിനിൽക്കെ, കൊച്ചുകുട്ടികൾ അടക്കമുള്ള വിദ്യാർത്ഥികളുടെ സുരക്ഷയെക്കുറിച്ച് രക്ഷിതാക്കൾ വൻ ആശങ്കയിലാണ്.
രാവിലെയും വൈകുന്നേരങ്ങളിലും കൂട്ടത്തോടെയെത്തുന്ന നായ്ക്കൾ ടൗണിലെ പ്രധാന റോഡുകളും പൊതുഇടങ്ങളും കൈയടക്കിയിരിക്കുകയാണ്. പുലർച്ചെ പ്രഭാതസവാരിക്ക് ഇറങ്ങുന്നവർക്ക് നേരെ നായ്ക്കൾ കൂട്ടത്തോടെ കുരച്ചുകൊണ്ട് പാഞ്ഞടുക്കുന്നത് പതിവ് കാഴ്ചയായി മാറിയിരിക്കുന്നു. ഇതുമൂലം പലരും രാവിലെ പുറത്തിറങ്ങാൻ പോലും ഭയപ്പെടുന്ന സാഹചര്യമാണ്. ഇരുചക്രവാഹന യാത്രക്കാർക്ക് നേരെ നായ്ക്കൾ ചാടുന്നതുമൂലം അപകടങ്ങളും ഇവിടെ പതിവാകുന്നുണ്ട്.
തെരുവ്നായ ശല്യം നേരിടാൻ പഞ്ചായത്ത് അധികൃതരുടെ ഭാഗത്ത് നിന്ന് അടിയന്തരവും ശാശ്വതവുമായ നടപടികൾ ഉണ്ടാകണമെന്നാണ് നാട്ടുകാരുടെ ശക്തമായ ആവശ്യം.