രാജപുരം; നീണ്ട 34 വര്ഷത്തെ സേവനത്തിനു ശേഷം കരിമ്പിൽ രമേശന് മാഷ് പടിയിറങ്ങുന്നു. ജി എച്ച് എസ് എസ് മൊഗ്രാല്, ജിയുപി എന്ന് മാനടുക്കം, ജിഎച്ച്എസ്എസ് ഷിറിയ,
ജിഎച്ച്എസ്എസ് ബേക്കൂര് എന്നിവിടങ്ങളില് പിഡി. ടീച്ചറായും ജി യു പി എസ് കണ്ണിവയല്, ജിയുപിഎസ് പെരുതടി, SVM GUPS എസ് വി എം ജി യു പി എന്ന് എടത്തോട് എന്നിവിടങ്ങളില് പ്രധാനാധ്യാപകനായും സേവനമനുഷ്ഠിച്ചു. എടത്തോട് ശാന്താവേണുഗോപാല് മെമ്മോറിയല് ഗവ.യു.പി.സ്കൂളില് നിന്നാണ് വിരമിച്ചത്
ഇരുപത്തിമൂന്ന് വര്ഷത്തോളം ജി എച്ച് എസ് എസ് പരപ്പയിലായിരുന്നു സേവനം. ഈ കാലയളവില് നിരവധി പ്രതിഭാധനരായ കുട്ടികളെ വളര്ത്തിയെടുത്തു. സബ് ജില്ല, ജില്ല, സംസ്ഥാന കായികമത്സരങ്ങളില് മലയോരത്തിന്റെ വ്യക്തിമുദ്ര പതിപ്പിച്ച സ്കൂളായിരുന്നു പരപ്പ. നിരവധി ഇന്റര്നാഷണല് താരങ്ങളെ വാര്ത്തെടുക്കുന്നതില് രമേശന്മാഷ് വഹിച്ച പങ്ക് ചെറുതല്ല. കുട്ടികളുടെ പാഠ്യ പാഠ്യേതര പ്രവര്ത്തനങ്ങളോടൊപ്പം അവരുടെ സന്തോഷത്തിലും സങ്കടത്തിലും ഒപ്പം നിന്ന വ്യക്തിത്വമാണ് മാഷിന്റേത്. രക്ഷിതാക്കള് പോലും അധ്യാപകന് എന്നതിലുപരി ഒരു കുടുംബാംഗം പോലെയായിരുന്നു മാഷിനെ കണ്ടിരുന്നത്. സ്കൂളില് കുട്ടികള്ക്ക് അപടമോ മറ്റെന്ത് ബുദ്ധിമുട്ടുകളോ നേരിട്ടാല് ആദ്യം ഓടിയെത്തുന്നതും ചികിത്സാകേന്ദ്രത്തിലെത്തിക്കുന്നതും മാഷായിരിക്കും. നിരവധി കുട്ടികളുടെ പഠനാവശ്യത്തിലേക്കായി സാമ്പത്തികമായും സഹായിച്ചിട്ടുണ്ട്. എടത്തോട് സ്കൂളിനെ സംബന്ധിച്ചടുത്തോളം 2023-24 മികവിന്റെ ഒരു അക്കാദമിക വര്ഷം തന്നെയായിരുന്നു. എല്ലാ മേളകളിലും മികച്ച വിജയം കരസ്ഥമാക്കാന് സാധിച്ചു. സബ് ജില്ലാ കായികമേളയില് യു.പി.വിഭാഗത്തില് ഓവറോള് ചാമ്പ്യന്ഷിപ്പ് നേടാന് സ്കൂളിന് സാധിച്ചു. ഖൊ-ഖൊ മത്സരത്തില് ജില്ലയിലെ തന്നെ മികച്ച ടീമായി മാറാന് സാധിച്ചു. സംസ്ഥാന തലത്തില് കുട്ടികള് മത്സരിച്ചു. ചിറ്റാരിക്കാല് ഉപജില്ല പ്രവൃത്തിപരിചയമേള എടത്തോട് സ്കൂളില് നടത്തി വമ്പിച്ച വിജയമാക്കിയതിനു പിന്നിലും മാഷിന്റെ സംഘാടന മികവ് ഒന്നുകൊണ്ടു മാത്രമാണ്. മികച്ച സംഘാടകനും ജില്ലയിലെ തന്നെ മികച്ച അനൗണ്സറും കൂടിയാണ് മാഷ്. ഈ നന്മമനസ്സ് പടിയിറങ്ങുമ്പോള് ഈ മേഖലയില് വലിയൊരു വിടവു തന്നെയായിരിക്കും എന്നുള്ളതില് സംശയമില്ല. വരക്കാട് ഹയര്സെക്കന്ററി സ്കൂള് അധ്യാപിക കെ.വി.ലിനിയാണ് ഭാര്യ. മക്കള്: നിരഞ്ജന് , നിയ. പി.ടി.എ നടത്തിയ യാത്രയയപ്പു സമ്മേളനം പരപ്പ ബ്ലോക്ക് പഞ്ചായത്ത് വൈസ് പ്രസിഡണ്ട് കെ.ഭൂപേഷ് ഉദ്ഘാടനം ചെയ്തു. പി.ടി.എ പ്രസിഡണ്ട് കെ.വിജയന് അദ്ധ്യക്ഷത വഹിച്ചു. ബളാല് പഞ്ചായത്തംഗം ജോസഫ് വര്ക്കി കളരിക്കല്, കോടോം ബേളൂര് പഞ്ചായത്തംഗം എം.വി.ജഗന്നാഥ്, എസ്എ.സി ചെയര്മാന് മധു കോളിയാര്, എംപിടിഎ പ്രസിഡണ്ട് ചിഞ്ചു ജിനീഷ് തുടങ്ങിയവര് സംസാരിച്ചു. സീനിയര് അസിസ്റ്റന്റ് കെ.ശശിധരന് സ്വാഗതവും എസ്ആർജി കണ്വീനര് വി.കെ.കൗസല്യ നന്ദിയും പറഞ്ഞു.