രാജപുരം: മാലക്കല്ല് സെൻ്റ് മേരീസ് എ യുപി സ്കൂളിലെ പുതിയ അധ്യായന വർഷത്തെ പ്രവേശനോത്സവത്തിൽ നവാഗതരെ കുരുത്തോലയിൽ തീർത്ത പൂച്ചെണ്ടുകൾ നൽകി വരവേറ്റത് വേറിട്ട അനുഭവമായി. വാർഡ് മെമ്പർ
മിനിപ്പ് ഉദ്ഘാടനം ചെയ്തു. സ്കൂൾ മാനേജർ ഫാദർ ഡിനോ കുമാനിക്കാട്ട് അധ്യക്ഷത വഹിച്ചു. വായനയ്ക്ക് അവധിയില്ല എന്ന പേരിൽ കുട്ടികളുടെ സർഗാത്മക കഴിവുകൾ വളർത്തുന്നതിനും വായനയിലും പഠനത്തിലും താൽപര്യം നിലനിർത്തുന്നതിനും ലക്ഷ്യമിട്ട അവധിക്കാല പരിപാടിയുടെ പ്രതിഫലനമായ 521 വായനാ പതിപ്പുകളുടെ പ്രകാശനം നാലാം ക്ലാസിലെ ആദിനന്ദ് പ്രധാന അദ്ധ്യാപകന് നൽകി നിർവഹിച്ചു, തുടർന്ന് പുതിയ അധ്യായന വർഷത്തെ അക്കാദമിക് മാസ്റ്റർ
പ്ലാനിൻ്റെ പ്രകാശനം, പുതിയ കുട്ടികൾക്കായി തയ്യാറാക്കിയ ഓട്ടോമാറ്റിക് ടോയ് കാറുകളുടെ ഉദ്ഘാടനം, കുട്ടികളുടെ വിവിധ കലാപരിപാടികൾ എന്നിവ വൈവിധ്യകരമായ രീതിയിൽ നടന്നു. കൂടാതെ കോളിച്ചാൽ ലയൺസ് ക്ലബ് , പനത്തടി സർവീസ് സഹകരണ ബാങ്ക്, മിൽമ സൊസൈറ്റി മാലക്കല്ല്, കെസിവൈഎൽ മാലക്കല്ല്, എന്നിവർ ഏർപ്പെടുത്തിയ പഠന ഉപകരണ കിറ്റ് വിതരണവും ഒന്നാം ക്ലാസിലെ കുട്ടികൾക്കുള്ള സൗജന്യ ബാഗ് വിതരണവും നടന്നു.
ഹെഡ് മാസ്റ്റർ എം.എ.സജി, ജിനോ ജോൺ, സോജോ തോമസ്, തോമസ് അടിയായപ്പള്ളി, ആൽബിൻ ജോർജ്, എ. സി.സജി, ഷൈനി ടോമി, ബിജു ജോസഫ് എന്നിവർ സംസാരിച്ചു.